ಮುಖಪುಟ

ನಿಮ್ಮ ಅನಿಸಿಕೆ

ಹೋರಾಟಗಳು

ಕಾರ್ಯಕ್ರಮಗಳು

ದೃಶ್ಯ ಮತ್ತು ಛಾಯಾಚಿತ್ರ

ಸಂಪರ್ಕಿಸಿ

ಉತ್ತರ ಕರ್ನಾಟಕದ ನೆರೆಪೀಡಿತರಿಗೆ ಪರಿಹಾರ - ವಿತರಣೆ  

ಕರ್ನಾಟಕದ ಇತಿಹಾಸದಲ್ಲಿ ಕಂಡರಿಯದ ಧಾರಾಕಾರ ಮಳೆ ಮತ್ತು ಉಕ್ಕಿ ಹರಿದ ನದಿಗಳಿಂದಾಗಿ ಉತ್ತರ ಕರ್ನಾಟಕದ ಜನರು ತತ್ತರಿಸಿ ಹೋಗಿದ್ದಾರೆ. 221 ಕ್ಕೂ ಹೆಚ್ಚು ಜನರು ಸತ್ತು, ಕೋಟ್ಯಾಂತರ ರೂಪಾಯಿಗಳ ನಷ್ಟವಾಗಿದೆ. ಉತ್ತರ ಕರ್ನಾಟಕದ ಜಿಲ್ಲೆಗಳ ಜನರ ಸಂಕಷ್ಟವನ್ನು ಮನಗಂಡು ಅದಕ್ಕೆ ಮಿಡಿದ ನಮ್ಮ ಕರ್ನಾಟಕ ರಕ್ಷಣಾ ವೇದಿಕೆಯು ರಾಜ್ಯಾಧ್ಯಕ್ಷರಾದ ಶ್ರೀ.ಟಿ.ಏ.ನಾರಾಯಣಗೌಡರ ಮುಂದಾಳ್ತನದಲ್ಲಿ, ತೊಂದರೆಗೀಡಾದ ಆಯಾ ಜಿಲ್ಲೆಯಲ್ಲಿರುವ ನಮ್ಮ ಶಾಖೆಗಳ ಕಾರ್ಯಕರ್ತರೊಂದಿಗೆ, ದಿ.10.10.2009 ರಿಂದ 14.10.2009 ರವರೆಗೆ ಗದಗ, ಕೊಪ್ಪಳ, ಬಾಗಲಕೋಟೆ, ಬಿಜಾಪುರ, ಗುಲ್ಬರ್ಗ, ರಾಯಚೂರು, ಬಳ್ಳಾರಿ, ಬೆಳಗಾವಿ ಜಿಲ್ಲೆಗಳ ಉದ್ದಗಲಕ್ಕೂ ಪ್ರವಾಸ ಮಾಡಿ ಅಲ್ಲಿಯ ಜನರಿಗೆ ನೆರವು, ಸಾಂತ್ವನಗಳನ್ನು ನೀಡಲಾಯಿತು.  

ಸತ್ತವರ ಕುಟುಂಬಗಳ ಭೇಟಿ ಮತ್ತು ನೆರವು ನೀಡಿಕೆ

ಈ ನೆರೆ ವಿಕೋಪದಲ್ಲಿ ಅನೇಕ ಕುಟುಂಬಗಳು ತಮ್ಮ ಆಪ್ತರನ್ನು ಕಳೆದುಕೊಂಡು ಬಹಳ ಸಂಕಷ್ಟಕ್ಕೆ ಸಿಲುಕಿವೆ. ಅನೇಕ ಕುಟುಂಬಗಳಲ್ಲಿ ದುಡಿಯುವ ಯಜಮಾನರಿಲ್ಲದೆ ಉಣ್ಣುವ ಗಂಜಿಗೂ ಪರದಾಟ ಪಡುವಂತಾಗಿದೆ. ಕರ್ನಾಟಕ ರಕ್ಷಣಾ ವೇದಿಕೆಯ ವತಿಯಿಂದ ಅಂತಹ ಕುಟುಂಬಗಳನ್ನು (ಕೆಳಗೆ ಕೊಟ್ಟಿರುವ ಪಟ್ಟಿ ನೋಡಿ) ಗುರುತಿಸಿ, ಅವರನ್ನು ಭೇಟಿ ಮಾಡಿ, ಅವರೊಂದಿಗೆ ಸಾಂತ್ವನದ ಮಾತುಗಳನ್ನಾಡಿ, ಪ್ರತಿಕುಟುಂಬಕ್ಕೂ ತಲಾ 5000 ರೂಪಾಯಿ ಸಹಾಯಧನವನ್ನು ವಿತರಣೆ ಮಾಡಲಾಯಿತು. ಒಟ್ಟು ಎಂಟು ಜಿಲ್ಲೆಯ 134 ಕುಟುಂಬಗಳಿಗೆ ಈ ರೀತಿ ನೆರವನ್ನು ನೀಡಲಾಯಿತು.

 

ಕ್ರ.ಸಂ.	ಜಿಲ್ಲೆ	ಮೃತ ಕುಟುಂಬಗಳ ಸಂಖ್ಯೆ
1	ಗದಗ	9
2	ಕೊಪ್ಪಳ	17
3	ಬಾಗಲಕೋಟೆ	23
4	ಬಿಜಾಪುರ	27
5	ಗುಲ್ಬರ್ಗ	10
6	ರಾಯಚೂರು	27
7	ಬಳ್ಳಾರಿ	11
8	ಬೆಳಗಾವಿ	10
	ಒಟ್ಟು	134

 

ಗಂಜಿ ಕೇಂದ್ರಗಳಿಗೆ ಭೇಟಿ ಮತ್ತು ಜೀವನಾವಶ್ಯಕ ವಸ್ತುಗಳ ವಿತರಣೆ

ನೆರೆಪೀಡಿತ ಪ್ರದೇಶಗಳಲ್ಲಿ ಮನೆಮಠಗಳನ್ನು ಕಳೆದುಕೊಂಡ ಸಾವಿರಾರು ನಿರಾಶ್ರಿತರನ್ನು ಗಂಜಿ ಕೇಂದ್ರಗಳಲ್ಲಿ ಇರಿಸಲಾಗಿದೆ. ಇಂತಹ ಕೆಲವಾರು ಶಿಬಿರಗಳಿಗೆ ಭೇಟಿ ನೀಡಿ ಸುಮಾರು ಎರಡು ಲಾರಿಯಷ್ಟು ಜೀವನಾವಶ್ಯಕ ವಸ್ತುಗಳಾದ ಬಟ್ಟೆ, ಆಹಾರ ಪದಾರ್ಥ, ಔಷಧಿ, ಬ್ರೆಡ್, ಬಿಸ್ಕತ್ತು... ಮೊದಲಾದವುಗಳನ್ನು ಅಲ್ಲಿನ ಜನರಿಗೆ ವಿತರಿಸಲಾಯಿತು.

ಅನಾಥ ಮಕ್ಕಳ ದತ್ತು

ಕರುಣೆಯೇ ಇರದ ನೆರೆ ಮಾಡಿರುವ ಹಾವಳಿಯಲ್ಲಿ ಅನೇಕ ಕಂದಮ್ಮಗಳು ತಮ್ಮ ಹೆತ್ತವರನ್ನು ಕಳೆದುಕೊಂಡು ಅನಾಥರಾಗಿದ್ದಾರೆ. ಇಂತಹವರಲ್ಲಿ ಗದಗ ಜಿಲ್ಲೆಯ ಹನ್ನೆರಡು ವರುಷದ ಕೌತುನಭಿ, ಹತ್ತುವರುಷದ ಮುನೀರ ಅಹಮದ್, ಎಂಟು ವರುಷದ ಅಂಜುಂಬಾನು, ಗುಲ್ಬರ್ಗಾ ಜಿಲ್ಲೆಯ ಹತ್ತುವರುಷದ ದೌಲಸಾಬ್ ಮತ್ತು ರಾಯಚೂರು ಜಿಲ್ಲೆಯ ಒಂಬತ್ತು ವರ್ಷ ವಯಸ್ಸಿನ ನಿರ್ಮಲ ಎಂಬ ಐದು ಮಕ್ಕಳನ್ನು ಕರ್ನಾಟಕ ರಕ್ಷಣಾ ವೇದಿಕೆಯ ವತಿಯಿಂದ ದತ್ತು ಪಡೆಯಲಾಗಿದ್ದು ಈ ಮಕ್ಕಳ ವಿದ್ಯಾಭ್ಯಾಸ, ವಸತಿಗಳ ಹೊಣೆಯನ್ನು ಹೊತ್ತು ಮುಂದೆ ಒಳ್ಳೆಯ ಭವಿಷ್ಯ ರೂಪಿಸುವ ಕೆಲಸಕ್ಕೆ ಮುಂದಾಗಿದ್ದೇವೆ.

ಮುಳುಗಡೆ ಪ್ರದೇಶ ವೀಕ್ಷಣೆ

ಗದಗ, ಕೊಪ್ಪಳ ಜಿಲ್ಲೆಗಳಲ್ಲಿ ನೆರೆಯಿಂದ ಸಂಕಷ್ಟಕ್ಕೆ ಒಳಗಾಗಿರುವ ಸಾವಿರಾರು ಬಂಧುಗಳನ್ನು ಭೇಟಿಯಾದ ನಂತರ ಹೀರೆಹಳ್ಳದ ಸೇತುವೆಯೂ ಸೇರಿದಂತೆ ಅನೇಕ ಮುಳುಗಡೆಯಾಗಿದ್ದ ಪ್ರದೇಶಗಳನ್ನು ಪರಿಶೀಲಿಸಲಾಯಿತು. ಈ ನೆರೆಯಿಂದ ಆಗಿರುವ ಅನಾಹುತ, ನಷ್ಟ ಮತ್ತು ತಕ್ಷಣ ಕೊಡಬೇಕಾದ ಪರಿಹಾರ, ಮುಂದಿನ ದಿನಗಳಲ್ಲಿ ನೆರೆಯಾದಾಗ ಮುಳುಗಡೆ ಆಗುವ ಹಳ್ಳಿಗಳನ್ನು ಸ್ಥಳಾಂತರ ಮಾಡಿ ಇಂತಹ ಅನಾಹುತಗಳನ್ನು ತಪ್ಪಿಸುವ ಬಗ್ಗೆ ಆಳುವವರು ಮತ್ತು ಅಧಿಕಾರಿಗಳು ಚಿಂತನೆ ನಡೆಸಬೇಕಾದ ಅಗತ್ಯವನ್ನು ಮನಗಾಣಲಾಯಿತು.